Si të humb peshë pas lindjes në mënyrë të shëndetshme

Pas lindjes, shumë nëna ndihen të motivuara për të rifituar formën që kishin para shtatzënisë. Megjithatë, është shumë e rëndësishme që humbja e peshës të mos jetë përparësi menjëherë. Trupi ka nevojë për kohë për t’u shëruar dhe rikuperuar, ndaj çdo ndryshim duhet të bëhet me durim dhe kujdes për veten.

Kur të filloni humbjen e peshës pas lindjes?

-Prisni të rikuperoheni fizikisht nga lindja, zakonisht 6 deri në 8 javë.

-Filloni me ushtrime të lehta, si ecje, sapo të ndiheni gati dhe nëse mjeku e lejon.

-Nëse jeni duke ushqyer me gji, rekomandohet të prisni të paktën 2 muaj para se të kufizoni kaloritë për të mos ndikuar te prodhimi i qumështit.

Çfarë duhet të prisni pas lindjes?

Trupi juaj mund të mos kthehet kurrë saktësisht si më parë, bark më i butë, strija, ije pak më të gjera, ose madhësi tjetër e këmbës janë të zakonshme.

Këto janë ndryshime natyrore dhe nuk duhet të shkaktojnë presion për të “kthyer trupin e vjetër”.

Ushqyerja pas lindjes për të humbur peshë

Mos ndiqni dieta ekstreme! Gratë kanë nevojë për 1600–2200 kalori në ditë, ose 2000–2500 nëse ushqejnë me gji.

Humbja graduale është më e sigurt, rreth 0.5–1 kg në javë.

Të hash më shpesh, por në sasi më të vogla (5–6 vakte të vogla në ditë) ndihmon më shumë se të anashkalosh vaktet.

Këshilla ushqimore:

Mos anashkaloni mëngjesin, ndihmon me energjinë dhe kontrollin e oreksit.

Shtoni më shumë fruta dhe perime, bëni smoothie, supa me perime të bluara ose perime të pjekura.

Konsumoni ushqime të pasura me fibra, tërshërë, mollë, bishtajore, drithëra integrale.

Zgjidhni yndyrna të shëndetshme, si avokado, peshk, arra, vaj ulliri.

Shtoni burime të proteinave në çdo vakt, vezë, mish pule pa yndyrë, thjerrëza, tofu.

Qëndroni të hidratuara, pini të paktën 11 gota ujë në ditë (sidomos gjatë gjidhënies).

Aktiviteti fizik pas lindjes

Filloni me ecje të lehtë me karrocën e bebit.

Aktiviteti fizik ndihmon jo vetëm në rënien nga pesha, por edhe në:

-Përmirësimin e humorit dhe gjumit

-Uljen e stresit

-Forcimin e muskujve abdominalë

Shënim: Nëse keni lindur me operacion cezarian ose ndjeni ende dhimbje pas lindjes, konsultohuni me mjekun përpara fillimit të çdo ushtrimi.

Mbani mend...

Trupi juaj ka kaluar shumë dhe ka krijuar jetë, trajtimi me butësi dhe kujdes është thelbësor.

Qëllimi nuk është të dukeni si dikur, por të ndiheni mirë, të shëndetshme dhe të forta për veten dhe beben tuaj.